RATISBONA vulgo REGENSPURG

RATISBONA, vulgo REGENSPURG

ad fluv. Regen, urbs Vindeliciae Episcopalis sub Archiepiscopo Salisburgensi in Bavaria inferiore ad Danubium, libera, pervetus, populosa et ampla, ubi Imperii Comitia fiunt. Olim Angusta Tiberii, testa Aventinô, utpote a Tiberio Caesare condita, et Colonia Quartanorum dicebatur, quod quarta legio Italica hîc stationem firmam haberet. Paruit olim Boiorum regibus, quorum etiam sedes fuit, sed imperante Fridericô I. libera facta, post Henricum Leonem proscriptum et Bavariam Ottoni Wittelspachio concessam, vectigalia tamen portoria non asseruit, quae hodieque partim Boiorum Principes, partim cives ex pacto obtinent. In limite est Palatinatus superioris 15.

milliar. German. a Monachio in Boream, 17. supra Patavium in Occasum 16. ab Augusta Vindelicor. in Caeciam S. Petrum Patronum agnoscit, unde etiam insignia habet Claves decussatim positas. Ponte danubium hîc iunxit Henricus V. Imperator, A. C. 1135. cui, quoad pilas altosque fornices, similem alium neque Danubius, neque Rhenus habet. Privilegiis insignibus donata est, a Friderico II. Carolo V. Rodolfo II. Imperatorib. Hîc quoque Primislaus Bohemiae Princeps, sordidô amictu victum ex gestatione lapidum, in fabrorum murariorum usum, quaesiisse, postquam duplici praeliô victus esset, A. C. 1197. refert Dubravius, Hist. Boh. Matthias vero Imperator, Comitiis habitis, Protestantes, ob gravatnina inprimis Consilii Aulic. et Camerae Imperial. non sublata, offendit, A. C. 1613. A Lucio Cyrenaeo, Pauli Apostoli discipulo, Christianismum est edocta circa A. C. 69. dein Episcopatus hîc institutus fuit, a Carolo M- de cuius in civitatem iuribus, Vid. Limnaeum Enucl. l. 4. c. 46. Ibidem Concilium a Carolo M. celebratum est A. C. 792. contra Felicem Urgelitan. Elipandi socium. Vide Hundium, in Metrop. Salisburg. Cluver. descript. Germ. etc. Colloquium ibidem inter Augustanae Confessionis Pastores et Iesuitas, institutum est a Maximiliano Bavaro, A. C. 1601. ubi ex parte illorum Aegidius Hunnius et Iac. Heilbrunnerus; horum Albertus Hungerus et Iac. Gretserus collocutores fuêre: Absolutum id 16. sessionibus, actumque tantum de auctoritate S. Scripturae: Sed, cum Augustani non aliam fidei normam, aliumque controversiarum Iudicem, quam Scripturam agnoscere vellent, re infectâ discessum est. Vide Thuan. Hist. l. 126. Augustana hîc Confessio floret.